Quid novi? (2)

visimus Albigensium terram

Feriarum tempore terram visi Albigensium, qui inde a saeculo XIX^o communiter vocati sunt Cathari. Nomen autem istud 'Catharorum' in scriptis saeculorum XII⁰ et XIII⁰ rarissime occurrebat nec indicavisse videtur coetum definitum. Immo, sub nomine Albigensium seu Catharorum sumuntur homines opinionum et persuasionum sat dissimilium. Diffusa tamen erat inter eos doctrina de duobus principiis.

In civitate Albiensi magna pars eorum christianorum domicilium habuit qui deinde Albigenses appellabantur. Initio, ut videtur, qui­dam catholici abusum Ecclesiaeque deformationem respuentes ac Gregorianae reformationi adhaerentes convenerunt ac sensim ad haeretica argu­menta propen­derunt, cum magna visa est eis mali potestas. Qua de causa doctrina de duobus principiis vigere coepta est: malum ac bonum, Deus et Satanas aequali potestate regunt ac orbis terrarum creatus est a principio malo, id est a Satana.

Nemo est quin videat malum in mundo valere, fides tamen nostra recte habeat Dei potestatem in Ecclesia ac mundo semper vincere ac inferi portas numquam praevalere!

Sanctus Dominicus, ordinis praedicatorum fundator, Dei verbum annuntians fidemque catholicam defen­dens, hanc haeresiam debellavit.

Visimus civitatem Albiensem cum oppido Epis­co­pali, civitatem Carcassonensem, arcem "Queribus", abbatiam Fontem frigidum (Fontfroide), aliaque loca cum Albigensium historia connexa. Exc. Episcopus Carcassonensis et Narbonensis, Missae sacrificio celebrato, nobis narravit varias res de illa Albigensium historia contorta.